ဗကသများအဖွဲ့ချုပ် ဒုဥက္ကဌဟောင်း ကိုလင်းထက်နိုင်အား စစ်ကောင်စီက ထောင်ဒဏ်ငါးနှစ် မတရားအမိန့် ထပ်မံချမှတ်
၂၀၂၃ ဖေဖော်ဝါရီ ၁၃၊ ဗကသ
ဗကသများအဖွဲ့ချုပ်၏ ဒုတိယဥက္ကဌဟောင်းဖြစ်သူ ကိုလင်းထက်နိုင် (ခ) ကိုဂျိမ်းအား ယနေ့ ဖေဖော်ဝါရီလ ၁၃ရက်နေ့တွင် ပုဒ်မ ၅၂(ခ) ဖြင့် ထောင်ဒဏ် ၅ နှစ် မတရားအမိန့် ထပ်မံချမှတ်လိုက်သည်။ ကိုလင်းထက်နိုင် (ခ) ကိုဂျိမ်းအား ၂၀၂၂ ခုနှစ် ဒီဇင်ဘာလ ၇ ရက်နေ့တွင်လည်း အင်းစိန်ထောင်တွင်း တရားရုံး၌ ပုဒ်မ ၅၀၅ (က) ဖြင့်ထောင်ဒဏ် ၃ နှစ် မတရားအမိန့်ချမှတ်ခံခဲ့ရပြီး ယခုဆိုလျှင် စုစုပေါင်း ထောင်ဒဏ် ၈ နှစ်အထိ မတရားချမှတ်ခံထားရသည်။
ကိုလင်းထက်နိုင် (ခ) ကိုဂျိမ်းအား ၂၀၂၂ ခုနှစ် ဇွန်လ ၁၈ ရက်နေ့တွင် ဗိုလ်တထောင်မြို့နယ်၌ ဖက်ဆစ်တပ်ကအကြမ်းဖက်ဖမ်းဆီးခဲ့ပြီး ၂၀၂၂ ခုနှစ် အောက်တိုဘာလအတွင်းက အင်းစိန်ထောင်ဗူးဝ ပေါက်ကွဲမှု/ပစ်ခတ်မှုတွင်လည်း ကိုလင်းထက်နိုင်အား ထောင်ဝင်စာ လာရောက်ပို့ဆောင်သည့် မိခင်ဖြစ်သူ ဒေါ်မေမေကြည် (ခ) ဒေါ်ကြီးမြင့် ထိခိုက်သေဆုံးခဲ့သည်။ မိခင်ဖြစ်သူ၏ နာရေးအား သွားရောက်ခွင့်ပြုရန် ကိုလင်းထက်နိုင်က တင်ပြတောင်းဆိုခဲ့သော်လည်း ထောင်အာဏာပိုင်များက ပယ်ချခဲ့သည်။
သတင်းနှင့်ပြန်ကြားရေးဗျူရို
ဗကသများအဖွဲ့ချုပ်
#abfsu #ဗကသ #ကိုလင်းထက်နိုင် #ဒုဥက္ကဌဟောင်း #whatshappeninginmyanmar
ပုံစာ -၂၀၁၅ မတ်လ၁၀ရက်နေ့တွင် အမျိုးသားပညာရေးသပိတ်စစ်ကြောင်းအား ဖမ်းဆီးအရေးယူခြင်းမပြုရန် ဆန္ဒထုတ်ဖော်ခဲ့သည့် ဗကသကျောင်းသားခေါင်းဆောင် ကိုလင်းထက်နိုင် (ခေါ်) ကိုဂျိမ်းစ်ကို ကမာရွတ်မြို့နယ် တရားရုံးတွင် ရုံးထုတ်စစ်ဆေးစဉ် (MPA)
